活動幹事 5B班 郭墁沂

唔經唔覺，今年已經係我準備喺田家炳內渡過嘅第五年，五年話長唔長，話短唔短，我嘅中學生涯亦都好快迎嚟尾聲。喺呢五年內所經歷嘅事有各種唔同嘅體會，無論係外在因素定內在因素，唔知幾時開始已經萌生咗一個想為呢間學校做少少野嘅念頭🌱。機緣巧合之下，我加入咗Cynosure 🌟呢個內閣，可以同其他12位成員一齊為同學帶嚟新穎嘅活動，帶俾大家更愉快嘅校園生活，更希望大家可以記得Cynosure🌟。

---

加入Cynosure係一個契機，我哋13個人大部分都唔係好熟悉對方但又要一齊傾活動流程同其他嘢，成個過程一啲都唔容易🙆。亦因為我哋有13個人，之後所遇到嘅困難同意見不合一定唔少，所以我哋更加要做到”關關難過關關過”💪🏻。整個過程一定會比想像中更加辛酸，但日後諗返轉頭，呢個一定係一段燦爛而美好嘅回憶🎆。

前面嘅嘢好似太正經，等我講啲輕鬆啲嘅嘢喇。雖然我外表睇落唔似係好多主意嘅人，各位我哋千其唔好以貌取人。俗語都有講”矮人多計仔”，所以我嘅計仔未必好似我嘅身高咁少，至於有咩計仔喇喎，而家我梗係唔可以劇透喇！等我哋成功當選之後，大家就會知道我哋Cynosure所有人都好多計仔，冇你估唔到，只有你想像唔到😗。

至於我點解想做活動幹事？

眾所週知，校園生活唔單止要讀書，仲要有啲娛樂架麻🤪！”Work hard play hard”，讀書讀得悶得滯都要解放吓去娛樂娛樂😏。而且見到以往學生會搞嘅活動都好吸引，令到我又想試吓為大家設計吓一啲創新又有趣嘅活動，希望為同學係單調嘅校園生活增添一啲色彩🌈，係同學嘅中學生涯中留低一啲好難忘嘅體驗👻。

六年中學生涯正值係最青春、最美好嘅時光，正正因為咁，我哋Cynosure想為大家帶嚟一段特別而又深刻嘅校園生活🕰。日後回首，希望大家發現原來中學生活都未必係過得咁不堪，咁枯燥乏味。

Cynosure🌟，正如我哋嘅名一樣，希望可以有幸陪伴各位同學，與大家共同進退，一齊進步，帶領你哋迎接創新又特別嘅校園生活🧭。