總務 5A班 淩天翊

「放棄就會失敗」

中學生涯僅僅六年，唔算長，同時唔可以話短，亦將會係人生中一段值得回望嘅回憶。我希望借呢個機會，同十二位閣員懷住共同嘅目標，作為同學同老師之間嘅橋樑，拉近師生關係。作為案內所，廿為同學引導方向。盡自己嘅全力，為家炳大家庭做到最好。

---

仲記得嗰一年嘅冬天，懵懂無知嘅我啱啱踏入家炳呢個大家庭，冇耐之後聽聞到因為冇學生會內閣，只可以由臨時學生會代理處理事務，宣布嗰陣，氣氛好似變得好凝重，老師嘅眼神中好似唔多唔少帶啲可惜又或者係失望，但係當時嘅我，仲未了解到事情嘅嚴重性。

直至我中三嗰一年，可能係因為內閣唔夠，中二嘅學生會原班人馬再一次參選左學生會選舉，並且冇其他嘅內閣與其競爭。可惜，可能係有啲同學想要新鮮感，最終嗰個內閣以7票之差落選左。當時喺點票現場嘅我，不經意望到了唔知道應唔應該望到嘅一幕。喺一個唔太起眼的角落度，落選左嘅嗰位內閣主席同副主席緊緊攬埋在一齊，喊左。平時上台充滿台風充滿威嚴嘅主席人設喺嗰一刻蕩然無存。幾咁努力只為呢個大家庭多出一分力，幾咁堅持即使有人話佢比不上以前嘅學生會。但係，呢一次嘅「失敗」壓倒左佢最後一條嘅稻草。絕望嘅淚水一滴一滴咁流落嚟，嗰個畫面至今我仍記憶猶新。而最後，冇左學生會嘅嗰一年相信大家都感受到無數嘅麻煩同困擾。

當我喺中四下學期嘅時候，主席向我送出左加入cynosure嘅邀請，此刻，我腦海中閃過一幕又一幕我喺家炳大家庭嘅所見所聞。一年接住一年喺呢個地方成長，歸屬感亦逐漸建立起嚟，隨住踏入家炳嘅第五年，我不禁喺心入面問自己：「到底係咪時候要做返啲野回饋呢個地方呢？」但最令我確信要加入學生會嘅莫過於嗰位主席嘅淚水，我確信我必須要喺呢個地方出一分力，留低一個痕跡。未來係唔確定，我希望我可以掌握呢個機會，如果到最後一定要流下淚水，我希望會係努力過後打擊嘅淚水，而唔係放棄過後失敗嘅淚水。

我知道，競選學生會從來都唔係一件易事，要處理種種嘅事務，成為師生之間的橋樑。但感恩一路上有十二位閣員嘅支持、幫助，令我處理工作慢慢開始得心應手，並且學識享受其中嘅樂趣。